OBRADOIRO DE MANGA E COLLAGE.

Hai uns días tivemos a satisfacción de anunciar que a biblioteca do noso centro recibiu un recoñecemento polas actividades realizadas en relación ao voluntariado de lectura. Dito recoñecemento veu acompañado dunha dotación económica que foi destinada á realización dun obradoiro de manga e collage impartido por  e que se celebrou no día de hoxe. Os obradoiros foron impartidos por Estudo Garabato e Carlos Gallego.

Na seguinte presentación de fotos podedes ver que traballos tan creativos fixeron as nenas e nenos que asistiron aos obradoiros, os cales participaron durante este curso nalgunha das liñas das Bibliotecas Escolares Solidarias (voluntariado de lectura e axudantes de biblioteca durante os recreos):

ÚLTIMA SESIÓN DO CLUB DE LECTURA.

O último luns deste curso tivo lugar na biblioteca de Tintón a última sesión do club de lectura deste curso. Nela o alumnado participante estivo facendo un repaso do último libro no que se centrou o club: "Mamá, quero ser Ziggy Stardust". Para iso María e Yolanda, as mestras encargadas de dinamizar o club de lectura, propuxeron un Kahoot consistente en 42 preguntas.

Ao finalizar o Kahoot as nenas e o neno integrantes do club de lectura remataron o mural que foron facendo en pasadas sesións. Quedoulles así de bonito:

A experiencia do club de lectura inaugurado este curso foi moi gratificante tanto para o alumando como para as mestras que o coordinaron, polo que agardamos que o próximo curso máis nenos e nenas se animen a participar nesta proposta que se ofrece desde a biblioteca do noso centro.

REPRESENTACIÓN TEATRAL DA RATIÑA PRESUMIDA EN INGLÉS.

O pasado venres 14 de xuño os nenos e nenas de 2º de Educación Primaria achegáronse ao ximnasio de Educación Infantil e ás aulas de 1º de primaria para facer unha representación teatral dun conto clásico da literatura infantil como é "A ratiña presumida", ou, mellor dito, "Pretty Ritty", xa que a representaron en inglés. Desde aquí queremos dar as grazas tanto ao alumnado como á teacher Teresa, que foi a encargada de preparar esta representación que tanto lle gustou ao alumnado máis cativo da nosa escola.

Nos vídeos que aparecen a continuación podedes ver o ben que fixeron as representacións teatrais.

AGRADECEMENTO AO ALUMNADO  DO VOLUNTARIADO DE LECTURA

Este xoves o alumnado de Educación Infantil e de 1º e 2º de Educación Primaria quixo dar as grazas aos padriños e madriñas do voluntariado lector (alumnado de 5º e 6º de Educación  Primaria) por todos eses momentos tan máxicos que lles fixeron pasar a través da lectura de contos que realizaron durante este curso.

Nesta última sesión do voluntariado de lectura o alumnado de E.I. e 1º e 2º de E.P. fixo entrega aos nenos e nenas de 5º e 6º dunha serie de agasallos que realizaron con moita ilusión ao longo destes días nas aulas. 

No seguinte vídeo tedes unha mostra do emocionados que estaban os nenos e nenas de 1º e 2º de E.P. ante a apertura dos agasallos por parte dos maiores.

Na presentación de fotos que aparece seguidamente podedes ver un resumo desta última sesión de voluntariado de lectura do curso tan especial, chea de agarimo e agradecemento.

RECOÑECEMENTO AO VOLUNTARIADO DE LECTURA

Temos a satisfacción de anunciar que a bilbioteca de Tintón acaba de recibir, xunto con outros 10 centros de Galicia, un recoñecemento polo labor desenvolvido a través do Voluntariado de Lectura. Este recoñecemento vén acompañado dunha dotación económica de 600 euros para destinar a actividades como a escrita creativa, a elaboración do booktrailers, os xogos cooperativos e tradicionais, etc.

Desde aquí damos mil grazas a todo o alumnado que participou no Voluntariado de Lectura, pois sen a súa colaboración non sería posible levar a cabo esta actividade.

Puideron gozar das lecturas que prepararon estas nenas e nenos de 5º e 6º de EP tanto o alumnado máis cativo do noso centro (EI e 1º ciclo de EP) como persoas de diversas idades de outros centros e asociacións da comarca de Bergantiños (AFABER, DOMUSVI e o CEE LENDA EDUCATIVA). 

A continuación tedes varias ligazóns para ver en que consistiron estas actividades:

APADRIÑAMENTO LECTOR

VOLUNTARIADO LECTOR EN AFABER

VOLUNTARIADO LECTOR EN DOMUSVI

VOLUNTARIADO LECTOR NO CEE LENDA EDUCATIVA

CONMEMORACIÓN DAS LETRAS GALEGAS

Na biblioteca de Tintón seguimos a facer balance deste curso que está a piques de rematar. Unha das conmemoracións que ten relación directa coa bilbioteca, os libros e a lectura é o Día das Letras Galegas, que este ano foi adicado a Luísa Villalta. No noso centro foi o Equipo de Dinamización da Lingua Galega o encargado de organizar e coordinar as diferentes actividades que se levaron a cabo. A actividade central foi a elaboración, por parte do alumnado das etapas de EI e EP, de prendas de roupa que tiñan rotuladas palabras que aparecen nos textos da autora homenaxeada. Estas prendas foron colocándose nun tendal, á vez que nenos e nenas recitaban poemas de Luísa. 

Na etapa de Educación Infantil as nenas e nenos fixeron un montón de flores e persoas para decorar un gran mural que se colocou na entrada do edificio de infantil. O mural representa un fermoso parque primaveral dedicado a Luísa Villalta.

RECOMENDACIÓNS LECTORAS

Durante este curso na biblioteca de Tintón puxemos en marcha as "Recomendacións lectoras" para dar a coñecer á comunidade educativa os títulos favoritos do alumnado; e quen mellor que as propias nenas e nenos para recomendar estas lecturas. Estas recomendacións fóronse publicando no Facebook e no Instagram da Biblioteca do Polbo Tintón.

Queremos dar as grazas a todo o alumnado que nos axudou a poñer en marcha esta actividade recomendando algún libro.

Como mostra de recomendacións lectoras podedes ver estes dous vídeos onde tres alumnas nos falan de "Unicornia" e "Comiendo con miedo".

 A NOSA BIBLIOTECA NAS REDES SOCIAIS

Co obxectivo de dar a coñecer as diversas actividades que se levan a cabo na biblioteca de Tintón, creáronse contas en FACEBOOK E INSTAGRAM. É moi sinxelo atoparnos: buscade "Polbo tintón" ou "a_biblioteca_do_polbo_tinton".

Se aínda non o facedes, animádevos a seguilas e darlle a 👍 e a  💜!

VISITAMOS O REXENERA FEST

Un ano máis, o alumnado do CEIP Bergantiños tivo a oportunidade de visitar o "Rexenera Fest". Este é un festival internacional de arte pública promovido polo Concello de Carballo que xa vai pola súa décima edición. Grazas a esta iniciativa a arte está presente a diario na nosa vila a través duns enormes murais que enchen de vida moitas paredes que antes estaban baleiras. Na seguinte ligazón podedes visitar a WEB OFICIAL DO REXENERA FEST.

Na presentación de fotos que aparece a continuación podedes ver a saída que fixeron no día de hoxe nenas e nenos de 2º de EP para observar diferentes murais que hai polas rúas próximas ao noso centro. A visita foi conducida por Maite, do Museo de Bergantiños, á que lle damos as grazas polo ben que nos explicou todas as curiosidades que se agochan detrás de cada mural. 

As nenas e nenos ao longo do percorrido tiveron a sorte de poder coñecer de primeira man como traballaban os artistas. Foi o caso de Tamara Alves, unha artista portuguesa participante no festival e que foi tan  amable de falarnos  do mural que estaba a realizar; do artista Stom 500, procedente de Suíza e de Pablo Astrain de Euskadi. Tamén lles agradecemos que nos adicaran un anaquiño do seu tempo.

Ademais o alumnado ten ocasión de participar nunha das actividades desta edición do Rexenera Fest, consistente nunha busca do tesouro a través de pistas que van atopando en diferentes murais. Unha vez que atopen o tesouro serán recompensados cun pequeno agasallo que terán que recoller no Museo de Bergantiños. Para aquelas familias que esteades interesadas en participar nesta actividade, aquí queda a LIGAZÓN.

PROXECTO DE CENTRO: OS XOGOS OLÍMPICOS.

Desde o blog da biblioteca de Tintón queremos compartir unhas imaxes sobre algunhas das diferentes actividades que se realizaron no centro arredor do proxecto de centro para este curso 2023/24: os xogos olímpicos.

Realizáronse numerosos murais para expoñer ideas acerca dos diferentes deportes, as mascotas olímpicas, a historia dos xogos, a figura da muller nos xogos olímpicos, etc. A celebración do Entroido tivo como fío condutor as olimpíadas, polo que os nenos e nenas foron creando diferentes elementos para a elaboración do seu disfrace. Na presentación que aparece a continuación podedes ver fotos en relación a todos estes elementos que acabamos de citar.

ORGANIZACIÓN DO VOLUNTARIADO DE BIBLIOTECA.

Durante este curso que está a piques de rematar a biblioteca de Tintón tivo uns bibliotecarios e bibliotecarias moi especiais: nenas e nenos de 5º e 6º de E.P. que xenerosamente dedicaron parte do seu tempo de lecer a colaborar na biblioteca colocando os libros nas estanterías, organizando material, poñendo música para ambientar este espazo, controlando o aforo da biblioteca, recomendando libros aos demais nenos e nenas, axudando a atopar libros ao resto do alumnado, etc.

Para organizar este voluntariado creáronse nove equipos de seis nenos e nenas (estaban mesturados por niveis e cursos); cada equipo corresponde a un elemento do medio mariño. Cada mes tiñan ao seu dispor na aula o calendario para consultar a que equipo lle tocaba cada día, de xeito totalmente autónomo.

Esta foi unha experiencia moi satisfactoria para todo o alumnado participante (un total de 54 nenos e nenas).

MOITÍSIMAS GRAZAS a estes nenos e nenas por este labor de voluntariado tan importante para o funcionamento da biblioteca durante o recreo!!!!

AS ACTIVIDADES DA NOSA BIBLIOTECA

Que pouquiño queda xa para que remate o curso!. Se por algo se caracterizou o curso 2023/24   na biblioteca do Polbo Tintón foi a diversidade de acontecementos e actividades que tiveron lugar en relación coa nosa biblioteca escolar: a súa remodelación, a creación do club de lectura, o voluntariado lector, os recreos de expertos/as e talentos, as lecturas en familia, etc., etc.

Aproveitamos a ocasión para dar as grazas a todo o alumnado participante, así como ao profesorado e tamén ás familias. Sen a participación e implicación de toda a comunidade educativa isto non sería posible. UN MILLÓN DE GRAZAS!!!!

Para que vos fagades unha idea botando unha simple ollada, aquí van as fotos dos calendarios de actividades da biblioteca de diferentes meses do curso:

VOLUNTARIADO LECTOR: LENDA EDUCATIVA.

No día de hoxe 10 nenos e nenas de 6º de E.P. visitaron o Centro de Educación Especial Lenda Educativa, situado en Coristanco, para levar a cabo unha actividade correspondente ao Voluntariado Lector.

Antes de comezar a dar conta das actividades realizadas, é necesario agradecer ao alumnado e ao equipo docente de CEE Lenda Educativa por abrirnos as súas portas e acollernos tan ben. Tanto para os nenos e nenas como para os docentes do noso centro foi unha experiencia enormemente positiva e enriquecedora. O feito de dar visibilidade e valor á diversidade funcional ten que estar sempre presente na sociedade en xeral e na escola en particular.

Compartiron parte da xornada con catro mozos e mozas que son alumnos deste centro: Antía, Zaida, Javi e Adam, con idades comprendidas entre os 17 e os 20 anos.

As actividades realizadas foron as que seguen:

-Presentación do alumnado do noso centro e tamén do alumnado e profesorado de Lenda Educativa.

-Lectura da obra "O carnaval dos animais" por parte dos nenos e nenas do CEIP Bergantiños.

-Realización de máscaras dos animais que aparecen no conto. Aquí o noso alumnado repartiuse para facer a actividade, de xeito que 5 nenos e nenas estaban con 2 alumnos do CEE. Mentres facían as máscaras charlaron, colorearon e cantaron.

-Cara o final da xornada tamén houbo tempo para que o alumnado de ambos centros gozase de xogos ao aire libre.

-Antes de marchar, os mozos e mozas de Lenda Educativa obsequiaron ao noso alumnado cuns marcapáxinas feitos por eles no centro.

Na seguinte presentación de fotos podedes ver un resumo en imaxes de todo o que vos acabamos de contar:

A continuación tedes algúns vídeos das nenas e nenos do CEIP Bergantiños lendo o conto, para que vexades o ben que o fixeron:

ENCONTRO CON IRIA MISA.

Este luns, 3 de xuño, alumnado de 5º e 6º de EP participou nun encontro virtual con Iria Misa, a autora dun dos libros sobre os que se traballou no club de lectura da biblioteca de Tintón: "Mamá, quero ser Ziggy Stardust". 

Desde aquí agradecémoslle enormemente a Iria que nos adicara parte do seu tempo a falarlle ao alumnado do noso centro desta obra e do seu proceso de creación.

Podemos dicir que os nenos e nenas tiveron o privilexio de poder ter un encontro coas dúas autoras das obras obxecto de análise no club de lectura: Xulia Pisón (tedes toda a información desta visita nunha entrada publicada o 2 de maio) e Iria Misa.

Durante este encontro Iria faloulles ás nenas e nenos da creación das personaxes, das cousas nas que se inspirou durante o proceso creativo da novela, do seu gusto pola música, o cine e a lingua inglesa (Iria é profesora de inglés en Educación Secundaria).

Tamén se falou do final do libro e abriuse un pequeno debate. O alumnado tivo ocasión de facerlle preguntas; aquí van algúns exemplos: se faría unha segunda parte desta novela, canto tempo lle levaba escribir unha obra ou se se gañaban moitos cartos coa escritura.

Deixámosvos unha pequena mostra deste encontro no seguinte vídeo: