RECREO DE TALENTOS: CONTACONTOS

No día de hoxe, no recreo de talentos, contamos con tres alumnas de 6ºC de EP: Claudia, Renata e Paula.

Deleitáonos cun contacontos sobre un relato creado por elas mesmas. En dito conto, as protagonistas creaban unha máquina para viaxar no tempo, porque querían coñecer a Marie Curie, a gran física e química.

Foi un relato cheo de grandes toques de humor, debido ao que lle ía acontecendo ás protagonistas.

 

Así mesmo, Claudia, Renata e Paula entonaron o conto de forma sensacional! Noraboa, rapazas!

Deixaron o relato na biblioteca para que poidades consultalo e desfrutar del.

 

MOITAS GRAZAS, CLAUDIA, RENATA e PAULA!

O polbo Tintón.

 

RECREO DE EXPERTOS: A QUEN ADMIRO E FÍSICA E QUÍMICA

Hoxe, contamos con dúas grandes presentacións e exposicións por parte dos irmáns Nieto Ures.

Nun primeiro momento, Sabela, alumna de 5ºA de EP, presentounos a persoa que ela admira: Pepa, a Loba. Pepa foi unha bandoleira que se converteu en lenda, co paso dos anos, a raíz das fazañas conseguidas por esta muller.

Sabela contounos os datos máis importantes e interesantes de Pepa, desde o nacemento ata a súa morte.

Para rematar, realizou un “quiz”, tipo trivial, con preguntas e respostas pechadas sobre a biografía de Pepa.

Quedamos todos abraiados coa figura desta muller, xa que a gran maioría do público asistente non a coñecía. Encantounos a todos/as! Grazas, Sabela!

Nun segundo momento, Xan, alumno de 5ºC de EP, desenvolveu unha presentación sobre Física e Química, falándonos e explicándonos, de forma clara, conceptos e contidos, como:

-       Que é a física.

-       A figura de Newton.

-       As 3 leis de Newton.

-       Elementos químicos.

-       A táboa periódica.

-       O gato de Schrödinger.

Como non lle deu tempo a rematar toda a exposición, Xan continuará no recreo de mañá. Contamos convosco!

 

 

 

 

MOITAS GRAZAS, SABELA e XAN!

O polbo Tintón.

 

RECREO DE TALENTOS: VIOLÍN E GUITARRA ELÉCTRICA

No día de hoxe, no recreo de talentos, contamos con dúas grandes actuacións.

Nun primeiro momento, actuou Emma, alumna de 4ºA de EP, tocando dúas pezas co seu violín. Emma leva 2 anos tocando este instrumento e mostrou ser unha gran violinista. Quedamos todos marabillados!

Logo, Mateo, alumno de 2ºC, deleitou ao público tocando unha peza musical coa súa guitarra eléctrica. Aínda que leva pouco tempo tocando este instrumento, ten unha gran destreza co mesmo.

Noraboa aos dous participantes de hoxe por agasallarnos cunhas grandísimas actuacións! Esperamos vervos de volta pronto!

 

MOITAS GRAZAS, EMMA E MATEO!

O polbo Tintón.

 

RECREO DE TALENTOS: BAILE GALEGO E PANDEIRETA

Este pasado venres, no recreo de talentos, contamos con dous grupos.

 

Nun primeiro momento, as alumnas Julia e Iria, de 3ºC de EP, mostráronos algún dos pasos e movementos básicos do noso baile tradicional, o baile galego (clica na imaxe para ver o vídeo).

Despois delas, deleitáronos cuns novos movementos as alumnas Ana e Lúa, de 2ºB de EP (clica na imaxe para ver o vídeo).

Nun momento dado, o público asistente animouse a replicar algún dos pasos (clica na imaxe para ver o vídeo).

A continuación, contamos con Nerea, de 5ºB de EP, e Noa, de 5ºC de EP, as cales nos agasallaron coas súas fermosas voces e o seu talento coa pandeireta.

Veaquí as podedes ver e desfrutar das súas grandes actuacións, clicando nas imaxes:

É formidable ver que as novas xeracións aprenden as nosas tradicións e costumes para seguir dándolles vida nun futuro.

 

MOITAS GRAZAS, JULIA, IRIA, ANA, LÚA, NEREA E NOA!

O polbo Tintón.

 

RECOMENDACIÓNS LECTORAS

"ANIMÁLGAMA": poemario infantil do carballés Ramón Sánchez 

No día de onte, Ramón Sánchez Varela, o noso veciño e antigo estudante do noso colexio, agasallounos cun dos seus exemplares, titulado "ANIMÁLGAMA". Trátase dun poemario infantil ilustrado por Lucía Barros e editado por Antela Editorial.

As historias deste libro están contadas cun ton divertido, para achegar aos máis pequenos/as da casa ao mundo da poesía.

 

Podedes saber máis de Ramón Sánchez e da súa obra, no seu perfil de Instagram, clicando na seguinte imaxe:

Esperamos saber pronto máis de ti e da túa obra, Ramón!

Saúdos.

O polbo Tintón.

 

RECREO DE EXPERTAS: SOBRES CON CARIÑAS

 

No día de hoxe, as alumnas de 3ºB de EP, Mayra, Carla e Zoe, impartíronos un obradoiro de realización de sobres decoradas con cariñas.

Foron explicando, con moita paciencia e paso a paso, como realizar un sobre para conter ou gardar elementos, como pode ser unha carta.

Unha vez feito, explicaron como realizar as distintas cariñas, para que resulte un sobre do máis simpático.

 

 

 

O público asistente ao obradoiro quedou encantado! E puideron levar as súas creacións con eles!

 

MOITAS GRAZAS, MAYRA, CARLA E ZOE! Foi un taller fantástico. Esperamos vervos pronto de volta!

O polbo Tintón.

 

 

 

 

 

 

 

 

MES DE FEBREIRO DE 2026

Aquí tedes o calendario deste mes de febreiro, no que poderedes consultar todas as actividades que desenvolveremos na biblioteca ao longo do mesmo.

APERTAS!

O polbo Tintón.