SESIÓNS DO CLUB DE LECTURA (5º E 6º EP).

O alumnado integrante do club de lectura do terceiro ciclo de EP seguiu analizando a primeira das lecturas do club: "La bibliotecaria nocturna".

A historia que conta esta  obra de banda deseñada ten como escenario principal unha biblioteca: a New York Public Library.

Os nenos e nenas tiveron ocasión de comprobar o famosa que é esta biblioteca, pois sae en películas como Cazafantasmas, Spiderman, etc. Buscaron información para saber que datos dos que saen no libro que leron son reais e cales son ficticios. 

Como en calquera club de lectura, unha parte importante da sesión foi dar  súa valoración persoal da lectura. En xeral a lectura gustoulles pero tampouco lles entusiasmou. Pensan que ten demasiados tópicos sobre algúns personaxes e non lle atopan moito sentido ao final da historia (opinan que é un pouco forzado).

Nunha sesión posterior o alumnado púxose mans á obra para comezar a facer unha maqueta da biblioteca:

RECREO DE EXPERTOS/AS: MULTIPLICACIÓNS.

 No recreo de expertos/as de hoxe contamos con Óliver, alumno de 3º de Educación Primaria, que lle ensinou aos nenos e nenas asistentes unha serie de trucos para as diferentes táboas de multiplicar: a do 0, 1, 2 (facendo o dobre), 3 (facendo o triple), a do 5, 9, 10, 11 e 12. Tamén formulou dous problemas. Foi unha sesión moi proveitosa e entretida. Desde aquí dámoslle un forte aplauso a Óliver.

EDUCANDO CON MALIBÚ NA BIBLIOTECA DE TINTÓN.

O venres a nosa biblioteca recibiu unha visita moi especial: un can chamado Mazapán que veu a sensibilizar aos nenos e nenas contra o abandono animal. A visita encádrase dentro da campaña EduCANdo con Malibú, promovida pola Casa Grande de Xanceda. 

O alumnado viu unha presentación sobre os coidados que necesitan as mascotas e a responsabilidade que temos cando adoptamos unha.

Finalmente as nenas e nenos tiveron a ocasión de aloumiñar a Mazapán, que é un can que adoptaron na granxa e que é axudante da cadela Malibú. Mazapán  está aprendendo a ser mestre como Malibú para  ir tamén  ás escolas a ensinarlles aos nosos pequenos a importancia de proporcionarlle aos animais o coidado e o agarimo que merecen.

OBRADOIRO DE POESÍA CON ANTÍA OTERO.

O pasado mércores o alumnado de 2º de Educación Primaria tivo a sorte de participar nun obradoiro de poesía impartido por Antía Otero (premendo AQUÍ tedes información sobre esta poeta). O título da actividade foi " Quen ten medo á poesía". 

A autora comezou explicándolle ás nenas e nenos que hai palabras explosivas e palabras pingas; a continuación propúxolles xogar con elas e con ton de voz. Tamén foron escribindo estas palabras  nun modelo de poesía proporcionado por Antía, polo que cada neno  e nena fixo a súa propia poesía.

Antía veu acompañada dunha bugaina, coa que fixo unha proposta moi máxica para o noso alumando: cada neno e nena foi poñendo a orella na buguina e puido escoitar palabras secretas que están gardadas dentro dela. A continuación murmuraron unha palabra para que a puidesen escoitar os nenos e nenas da outra aula.

 

DÍA DE ROSALÍA.

No noso centro e Equipo de Dinamización da Lingua Galega organizou unha actividade conmemorativa para o Día de Rosalía cun orixinal mural feito en conxunto por todo o alumnado do centro:

Os nenos e nenas de Educación Infantil decoraron o mural con camelias coloreadas por eles mesmos e o alumnado de Educación Primaria compuxo a imaxe de Rosalía escribindo os seus nomes.

Na biblioteca de Tintón Rosalía de Castro tivo estes días un recuncho especial para que as nenas e nenos que acoden á biblioteca coñezan un pouquiño máis da súa obra:

No edificio de Educación Infantil tamén está presente Rosalía cun fermoso mural na entrada para o cal o alumnado coloreou flores e follas; e que mellor maneira de recordar a esta ilustre poeta que cantando un anaquiño dun dos seus poemas da obra "Cantares gallegos": "O moucho":

 

RECREO DE EXPERTOS/AS: OBRADOIRO DE DEBUXO.

Este martes no recreo de expertos/as contamos cun alumno especialista en debuxar dinosauros:  Xoel, de 3º de E.P.

As nenas e nenos que se achegaron ao obradoiro tiveron a oportunidade de aprender a debuxar estes animais prehistóricos grazas ás indicacións e trucos que lles foi dando Xoel.

Dámoslle un forte aplauso a Xoel polo seu talento á hora de debuxar dinosauros e por explicar tan ben como se poden ir facendo paso a paso.

 

O QUIOSCO DE TINTÓN.

Esta semana na nosa biblioteca inauguramos un novo espazo: o quiosco. Nel o alumnado que visita a biblioteca de Tintón ten ao seu dispor diferentes revistas e xornais. Desde aquí animamos a todos os nenos e nenas a gozar deste espazo.

VISITA DE FEGEREC Á NOSA BIBLIOTECA.

O xoves a biblioteca de Tintón recibui a visita de dúas traballadoras de FEGEREC - A Coruña (Federación Galega de Enfermidades Raras e Crónicas). Como xa contamos nunha entrada anterior, un grupo de alumnado de 6º de E.P. do noso centro fixera unha visita á sede desta asociación en decembro de 2024.

Nesta ocasión o alumando de 6º de E.P. e tamén o de 2º de E.P. recibiu de primeira man información sobre as enfermidades raras.

O alumnado de 2º de E.P. coñeceu a Federito, que é un trevo de catro follas que, ao igual que as enfermidades raras, é moi pouco común pero que existe e é necesario facelo visible. Unha parte da actividade consistiu na elaboración dunha diadema con forma de trevo, actividade que lles encatou a todas as nenas e nenos asistentes e na que ademais levaron un recordo para a casa  relacionado con  todo o aprendido.

No caso do alumnado de 6º de E.P., os rapaces e rapazas puideron ver unha presentación na que se explicaba que moitos persoeiros coñecidos teñen enfermidades raras, aínda que sexa un feito que non se perciba de inmediato. Fixeron tamén unha dinámica de grupo cun personaxe chamado Román. Ademais, o alumnado pertencente ao voluntariado solidario que visitara a asociación  o pasado decembro explicoulle ao resto de compañeiros todo o que aprenderan sobre as enfermidades raras na súa saída á sede da asociación na Coruña, así como a súa experiencia colaborando no empaquetado de bastóns de caramelo para a campaña navideña promovida por esta entidade. O obxectivo desta campaña foi recaudar fondos para colaborar  na investigación sobre este tipo de enfermidades, algo sobre o  que tamén se reflexionou  nesta xornada na nosa biblioteca.

RECREO DE EXPERTOS/AS: COMECOCOS.

No recreo de expertos/as do pasado martes contamos con tres expertos en elaborar comecocos: Abril, Enzo e Sofía, alumnos de 2º de Educación Primaria. Fóronlle explicando paso a paso aos compañeiros e compañeiras que asistiron a esta nova edición dos recreos na biblioteca do polbo Tintón como facer un comecocos. Aquí podedes ver o ben que o fixeron. 

LOGOS DOS CLUBS DE LECTURA.

Presentámosvos os logos creados polo alumnado para os clubs de lectura:

 3º de Educación Primaria: LECTOAVENTUREIROS

4º de Educación Primaria: OS PEQUENOS LECTORES

Verdade que son moi bonitos e orixinais? Un aplauso enorme para estes amantes da lectura!

NOVIDADES DO PROXECTO "CANTA, MIÑA COMPAÑEIRA".

Tal e como vos contamos nunha PUBLICACIÓN ANTERIOR  do noso blog, o CEIP Fogar e o CEIP Bergantiños están a levar a cabo un proxecto conxunto sobre a figura das cantareiras e da tradición oral na contorna de Carballo. Con motivo da celebración do Día das Letras Galegas, dedicado á poesía popular oral, decidimos investigar sobre esta temática nas diferentes parroquias do noso concello.

Para dinamizar este proxecto común creouse un blog específico, no cal poderedes atopar todas as novidades e actividades que se vaian realizando. Aquí tedes a ligazón:

CANTA MIÑA COMPAÑEIRA BLOG

Nas primeiras entradas do blog poderedes ver unha presentación do proxecto por parte do alumnado dos dous centros (recordamos que son nenas e nenos de 3º e 4º de Educación Primaria).

Outra das actividades que aparecen no blog  é a creación e elección do logo do proxecto.

Para rematar, amosámosvos os libros específicos que chegaron estes días á biblioteca de Tintón para desenvolver este proxecto.

RECREO DE TALENTOS: BEATBOX.

Este venres na biblioteca do polbo Tintón tivemos a sorte de gozar da arte de Unai, de 4º de Educación Primaria, facendo beatbox. Neste vídeo podedes ver o gran talento deste rapaz.

VOLUNTARIADO SOLIDARIO: VISITA DE ÍNTEGRO.

Este xoves tivemos o pracer de recibir na biblioteca de Tintón a visita de varias persoas usuarias da asociación ÍNTEGRO. O alumnado participante no voluntariado solidario acolleu a Dani, José Carlos, Fani, Isa e Carlos, que viñeron acompañados de Cintia (que forma parte do persoal que traballa nesta asociación).

Con motivo da celebración do Día internacional da muller e da nena na ciencia, o vindeiro 11 de febreiro, unha das actividades realizadas tivo como fío condutor esta conmemoración. Nas seguintes ligazóns tedes información sobre este día internacional:

NACIÓNS UNIDAS

11 DE FEBRERO

CONSEJO SUPERIOR DE INVESTIGACIONES CIENTÍFICAS

A primeira das actividades consistiu no visionado dunha presentación con información sobre inventos creados por mulleres.

A continuación os membros de Íntegro e o noso alumnado tiveron que ir relacionando as fotos de varias científicas españolas coa descrición do seu traballo. Entre elas atopábanse as carballesas Verónica Bolón, Xanel Vecino e María Gómez.

A xornada rematou cun obradoiro de chapas, onde cada quen fixo a súa propia chapa do polbo Tintón a modo de recordo desta visita.

Desde aquí dámoslle as grazas ás persoas usuarias de Íntegro e á profesional que os acompañou por facernos esta visita que tanta ilusión lle fixo aos nenos e nenas que colaboran no voluntariado solidario.

A continuación podedes ver unha presentación de fotos coas actividades que se fixeron ao longo da xornada.