SEGUNDA SESIÓN DE RECREOS DE EXPERTOS/AS.

O pasado martes tivo lugar o segundo recreo de expertos/as na biblioteca de Tintón. Nesta ocasión foi:

 O alumnado puido gozar dun obradoiro de "lettering", a través do cal practicaron a arte de debuxar letras. Para moitos  nenos e nenas esta actividade foi un descubrimento que pode chegar a converterse nunha  nova afección. Para outros era unha actividade na que xa amosaban interese e trataron de perfecionala grazas aos coñecementos transmitidos por Iris e Carmen.

Aquí vos deixamos unhas fotos do desenvolvemento da actividade:

     

     

    

    L E T T E R I N G

    💗💗💗💗💗💗💗💗💗💗

 O ALUMNADO DE EDUCACIÓN INFANTIL VISITA A BIBLIOTECA

Hoxe a nosa biblioteca recibiu a visita das nenas e nenos de 5º de E.I., co obxectivo de coñecer este espazo do centro e descubrir o mundo máxico de contos que se atopa na zona destinada ao alumnado de 3 a 6 anos. Este recanto da biblioteca está especialmente deseñado para estas idades, cos libros á súa altura e con alfombras e coxíns para que poidan gozar dos contos nun ambiente cómodo e relaxado.

Foi tamén o momento de coñecer algunhas normas da biblioteca, como son falar en voz baixiña, coidar moito os contos e quitar o calzado para estar no recanto dedicado aos máis peques do centro.

Con ocasión desta visita cada  neno e nena escolleu un título para levar en préstamo e gozar da lectura na casa.

Tamén houbo tempo de escoitar música relaxada, pois a biblioteca de Tintón é un espazo no que este tipo de música é sempre benvida. Ao celebrarse este venres o Día de Rosalía o tema escollido foi "Rosalía pequeniña", cantado por Uxía Senlle. No vídeo que aparece a continuación podedes comprobar como os nosos pequechos deseguido souberon a quen lle estaba cantando Uxía.

RECREOS DE TALENTOS

Non paran de chegar novidades á nosa biblioteca! Nesta ocasión toca falar de:

a través desta proposta o alumnado poderá amosar talentos de diferente tipo ao resto dos seus compañeiros e compañeiras. Deste xeito poderá dar a coñecer actividades e aficcións aos seus iguais, ao tempo que favorecen o desenvolvemento de algo tan fundamental como é o seu autoconcepto e autoestima. Para este mes de febreiro xa hai programadas dúas actividades: unha exhibición de baile e un concerto.

 

MERGULLÁMONOS NO OCÉANO DOS LIBROS

Comezamos a semana na biblioteca de Tintón cunha actividade moi especial: o club de lectura "Océano dos libros". O alumnado participante na actividade recibiu como agasallo de benvida unha bolsa que contiña a lectura que será obxecto de análise no club, un caderno, un marcapáxinas e material funxible.

 

A obra escollida para iniciar o club de lectura é un libro de banda deseñada titulado  "Microalgas", da autora Xulia Pisón. A primeira actividade realizada foi observar a portada e a contraportada e a partir de aí houbo unha choiva de ideas sobre a temática que podía ter o libro. O alumnado amosouse moi participativo e foron xurdindo temas como a catástrofe ecolóxica do Prestige, a figura de Man de Camelle, os vertidos de pelets, etc. 

Tamén se abordaron cuestións relativas aos obxectivos que podería ter o club de lectura, cales son as súas expectativas, etc.

Estaba previsto elaborar un cartaz para crear un  recanto propio  do club de lectura na biblioteca.... pero o tempo pasou voando e queda pendente para a próxima sesión.

 PRIMEIRA SESIÓN DO RECREO DE EXPERTOS/AS: TALLER DE MÁSCARAS.

O pasado 6 de febreiro tivo lugar o primeiro "Recreo de expertos" na biblioteca do polbo Tintón. Nesta ocasión, dada a proximidade do Entroido, as alumnas de 4º de Educación Primaria Daniela, Dunia e Elena impartiron un taller de máscaras.

As nenas comentaron que lles gustan moito as manualidades e que cando viron a convocatoria do "Recreo de expertos" animáronse a apuntarse para dar un obradoiro de manualidades, concretamente para elaborar máscaras de Entroido.

Durante a realización do taller foron proporcionado axuda e orientacións ao alumando que quixo facer as súas máscaras. Tanto Daniela como Dunia e Elena indicaron que o obradoiro estaba indo moi ben e que lles estaba a resultar unha experiencia positiva e interesante.

Na seguinte presentación podedes ver  fotos  do desenvolvemento e o resultado desta actividade.

RECREOS DE EXPERTOS / AS

Na nosa biblioteca seguimos a ter novidades que contarvos!

Nesta ocasión trátase dunha actividade que se desenvolverá durante o tempo de lecer do noso alumnado.  Entre os obxectivos desta proposta destacan:

• Promover unha maior interrelación entre as nenas e nenos de diferentes cursos.
• Favorecer o coñecemento mutuo entre alumnado con intereses e inquedanzas comúns.
• Reforzar a autoestima daqueles nenos e nenas que se animen a participar nesta actividade.
• Dinamizar o tempo de lecer do noso centro en xeral e do espazo da biblioteca en particular.

Non perdades de vista este blog nin as nosas redes sociais, pois iremos ampliando información sobre esta nova proposta.

 

CLUB DE LECTURA "OCÉANO DOS LIBROS" 

Na biblioteca do polbo Tintón comezamos o ano cunha nova actividade: o club de lectura "Océano do libros". Está dirixido ao alumnado de 5º e 6º de Educación Primaria.

Está previsto que o club se reúna unha vez ao mes para intercambiar impresións arredor das dúas lecturas previstas:

"Microalgas. O mundo oculto", da autora Xulia Pisón.

"Mamá, quero ser Ziggy Stardust", escrito por Iria Misa e con ilustracións de Alba Barreiro.